Scrivüü in lengua zeneise - Con navegâ in sce Internet, ve saiei adæti che gh'è un muggio de sciti che s'appreséntan pròpio ben: tutti luxe che lampezza, figùe che se mescia, ballette che gïa, de vòtte gh'è da mùxica e via de sto passo; ma dappeu, s'anæ à ammiâ un pittin ciù ben cöse gh'è scrïto drento, no gh'è guæi ninte.

Gh'è di catàloghi de libbri e de reviste, stæti fæti con 'nna gran cùa pe-a gràfica, che ve fan vedde e seu covertinn-e, i tìtoli di artìcoli che gh'an drento, ma i testi no ghe î méttan; de reviste che vendian çinque còpie, se ê véndan, (e che tïan avanti söo perché gh'an l'aggiutto do Comune, da Provinsa, de quarche Cascia de Risparmio) gh'an poïa de mette i seu artìcoli in sciâ Ræ, in caxon che maniman no véndan manco ciù quelle çinque còpie mòrte da-o seunno.

Ma sti scignöi gh'avian mai pensòu à cös'a peu servî Internet pe'n davvei? Se saian mai appensæ à tutte e poscibilitæ, tòsto infinïe, che se n'arve depoì? O fæto o l'è che i primmi tempi a Ræ â deuviava söo che di inzegnê, che de studdi umanìstichi no se n'accapìvan guæi; dappeu à comensòu à inteessâsene ch'an pensòu à comme tiâghe feua de palanche, e va tutto ben; ma òua, dòppo mai tanto tempo, o vëo scignificato de Internet o dovieiva ëse ciæo à tutti i ätri ascì: me ne fasso assæ d'attrovâmeghe i catàloghi de l'Einaudi e da Mondadori, co-i seu aotoî, che magara se stàmpan i libbri à seu speise e indùan unna saxon sola, con tutto che i crìtichi de profescion ghe â méttan tutta pe insciâli à ciù no dî.

Me ne fasso ben do bello d'attrovâghe sti avansi remenæ de'nna coltùa de longo pægia, scciava di seu padroin, ch'a no l'à ciù ninte da dî e ch'a ghe â mette tutta pe no fâ pensâ nisciun.

Ma o descorso o cangia se, tanto pe fâ un exempio, comenso à attrovâ in sciâ Ræ un libbro de Alexander Dughin, un che i seu libbri no î veddei de segùo inti Oscar Mondadori e che no sò manco s'o gh'è mai arrivòu inte libbraie de nòstre parte.

E chi o l'è? - me domandiei tutti. O Dughin o l'è l'ideòlogo do Zhirinovskj, un polìtico ruscio che i giornali e e televixoin regàttan à dâghe de græn bòtte de scemmo, de matto, de un ch'o stralabbia.

Quande ne pàrlan. Perchè pe-o ciù no ne pàrlan pesso, fan mostra ch'o no ghe segge manco. Peu dâ ascì ch'o ciòcche, e no me veuggio mette chì òua à raxonâ in scê idee do Dughin, ma quande son mai tanti à trattâ da scemmo un, che a-o seu paise o l'è quarchidun, ma ch'o tïa à mezo di descorsci che dan breiga a-i Americæn, gh'è da stâ in trappa. E s'o no ciocchesse pròpio arrëo comm'a vorrieiva a stampa oçidentale? Se inte quarche pestummo de quello ch'o dixe ghe foïse do vëo, e o gh'æisse dæto into segno?

Me diei: ma allöa ti ti defendi un naçionalbolscévico,un che e seu idee en stæte condannæ da-a Stöia, un ch'o ghe l'à co-o Capitalìximo? E no ti ô sæ che o Capitalìximo o l'è l'Avvegnî e o Progresso e no se ne peu fâ de meno?

Scì, che ô sò e no me permettieiva mai de méttime à fâ o mäfiaddo: l'Avvegnî e o Progresso son de cöse importante, mæximo se pe arrivâghe o Capitalìximo o se mette finn-a d'accòrdio co-i seu nemixi mortæ,e quande massàcran e gente à Tien-an-men, ò da quarche ätra parte, o fa mostra de ninte; ma stæ segùi che, in sciâ fin, arriviëmo à un Progresso regioso.

Söo che me domando se peu ëse che un filòsofo o se mette à filosofâ coscì, perchè o gh'à a lengua in bocca, e unna pëna de pe-e moæn. A-o manco stemmo à sentî cös'o l'à da dî. Se i seu libbri no s'attreuvan, perchè - dìxan - o no l'à un mercòu, te ô lì che Internet a vegne à taggio, e dappeu se porrià vedde. Perchè no se peu dâ, che tutto quello che sghinda da-a nòstra mainëa de pensâ, niätri femmo conto ch'o no l'existe pròpio. Into mæximo scito che gh'è o Dughin, gh'attrovæ ascì unna verscion - despægia arrëo da quella che conoscemmo - de raxoin e di desviluppi da guæra into Kòsovo: a verscion de parte serba: semmo segùi che no ghe segge a breiga d'anâsela à lëze? Ò l'è mëgio stâsene da veitæ bella pronta che n'ammenestra a televixon e i giornali?

In sciâ fin, a cösa ciù importante a l'è che e idee pòssan giâ de lengê, sensa che nisciun ne vegne à dî cöse l'è che dévimo pensâ e cöse no. E l'è pe quello che no me gusta guæi nisciun de quelli che vorrieivan regolamentâ Internet; a saià unna mæ fissaçion, ma me pâ che sti chì vorreivan fâne collâ tutto quello che dìxan lô, con quella mainëa de fâ comme se lô san tutto e söo che lô peuan fâ o nòstro ben, perchè da pe niätri no ghe poemmo pensâ.

Comme de sti ùrtimi anni, che n'an dæto da intende che l'Union Éuropea a saieiva stæta pe tutti chissà che passo avanti, e se attrovemmo à aveighe da fâ con 'n organìximo ancon ciù çentralista che i Stati naçionali, e ch'o se mesccia de tutto, de comme beseugna fâ a ciccolata e o pesto, à segonda de lobbies, che comanda à Bruxelles, e ch'o no vedde l'öa de intrigâse de chi elezzemmo e de chi no elezzemmo, de longo pe-o nòstro ben, s'accapisce. Ma fòscia in sce sto descorso chì ghe torniëmo unn'ätra vòtta.

Autur: Alessandro Guasoni - Funt: Bollezzumme! N. 1 - Arvî-Mazzo 2000

Spedij'l Lunedì, 01 agosto @ 04:10:10 CEST de Amministratur